នាយករដ្ឋមន្ត្រីថាអ្នកមិនទៅបោះឆ្នោតនឹងក្លាយជាជនឯកោនឹងពាក់ព័ន្ធលោកសម រង្ស៊ី
សម្តេចនាយករដ្ឋមន្ត្រី ហ៊ុន សែនបញ្ជាក់ថាចំពោះអ្នកដែលមិនទៅបោះឆ្នោត នឹងក្លាយជាជនឯកោព្រមទាំងពាក់ព័ន្ធជាមួយនឹងលោក សម រង្ស៊ី អតីតប្រធានគណបក្សសង្គ្រោះជាតិដែលកំពុងរស់នៅប្រទេសបារាំង។
ការលើកឡើងខាងលើនេះ ធ្វើឡើងក្នុងជំនួបសំណេះសំណាលជាមួយកម្មករ កម្មការិនី នៅស្រុកត្រាំកក់ ខេត្តតាកែវ កាលពីព្រឹកថ្ងៃអាទិត្យម្សិលមិញ។សម្តេចនាយករដ្ឋមន្ត្រីបន្ថែមថា ទោះទៅបោះឆ្នោតឬមិនទៅបោះឆ្នោត គឺជាសិទ្ធិសេរីភាពរបស់ប្រជាពលរដ្ឋ។ប៉ុន្តែមិនគួរធ្វើឱ្យខុសពីគេត្រឹមមួយឬពីរនាក់នោះទេ ព្រោះនឹងក្លាយជាជនឯកោហើយគេនឹងកត់សម្គាល់ថាពាក់ព័ន្ធនឹងក្រុមក្បត់ជាតិ។សម្តេចបញ្ជាក់ថា៖ «សូមទៅចូលរួមបោះឆ្នោត ចលនាណាក៏ដោយ ពិតមែនវាជាសិទ្ធិ។ក៏ប៉ុន្តែវាមិនគួរទេ ម៉ាភូមិ ១០០គ្រួសារ គេទៅបោះឆ្នោត ៩៨ ឯងនៅសល់ ២ហ្នឹង ថ្ងៃក្រោយមើលមុខគេអាមិចទៅ វាទៅជាជនឯកោ ហើយត្រូវបានគេកត់សម្គាល់ថាជនប្រឆាំងនឹងការបោះឆ្នោត ហើយក៏នឹងពាក់ព័ន្ធអាមេខ្លោងក្បត់ជាតិ៣ជំនាន់នោះ ដែលវាឱ្យធ្វើអ៊ីចឹង អ៊ីចឹងទេថ្ងៃក្រោយរស់នៅជាមួយគេវាលំបាក អ៊ីចឹងទេ យើងអនុវត្តសិទ្ធិយើង ត្រូវធ្វើរយៈពេលខាងមុខនេះ»។សម្តេចបន្តថា ក្នុងនាមជាប្រជាពលរដ្ឋមិនត្រូវភ្លេចទៅបោះឆ្នោតនៅថ្ងៃខាងមុខនោះទេ ព្រោះរដ្ឋាភិបាលបានអនុញ្ញាតឱ្យឈប់សម្រាករយៈពេល៣ថ្ងៃ ដោយទទួលបានប្រាក់បៀរវត្ស។សម្តេចហ៊ុន សែន បន្ថែមថា ប្រជាពលរដ្ឋមានសិទ្ធិទៅបោះឆ្នោតគ្រប់ៗរូប និងជ្រើសរើសនូវគណបក្សណាដែលមានលទ្ធភាពផ្តល់សេចក្តីសុខនិងសន្តិភាពសម្រាប់ប្រជាពលរដ្ឋទាំងអស់គ្នា ជម្រើសដ៏ល្អសម្រាប់ប្រជាពលរដ្ឋ គឺបន្តបោះឆ្នោតឱ្យគណបក្សប្រជាជនកម្ពុជាដើម្បីធានាការអភិវឌ្ឍ។សម្តេចនាយករដ្ឋមន្ត្រីបន្តថា ទោះអតីតនាយករដ្ឋមន្ត្រីថៃ២នាក់បងប្អូនក៏គេមិនដែលនិយាយម្ដងណាឡើយពាក់ព័ន្ធនឹងទាមទារឱ្យបរទេសគាបសង្កត់ ចំពោះនយោបាយនិងសេដ្ឋកិច្ចរបស់ថៃ។ប៉ុន្តែខុសពីអ្នកនយោបាយជ្រុលនិយមនៅកម្ពុជា បែរជាប្រាប់ឱ្យគេដាក់ទណ្ឌកម្មកម្ពុជាទៅវិញ។សម្តេច ហ៊ុន សែន បញ្ជាក់ថា៖ «ការងារដែលក្មួយៗបានសព្វថ្ងៃនេះ បានមកពីណា? មិនមែនបានមកពីក្រុមប្រឆាំងទេគឺបានមកពីការដឹកនាំរបស់គណបក្សប្រជាជនកម្ពុជា ការដឹកនាំរបស់រាជរដ្ឋាភិបាល ពួកប្រឆាំង បានត្រឹមតែទៅប្រាប់បរទេសកុំមកវិនិយោគនៅកម្ពុជា កុំមកទិញទំនិញពីកម្ពុជា និងសូមឱ្យដាក់ទណ្ឌកម្មចំពោះកម្ពុជា»។លោក សំ គន្ធាមី នាយកប្រតិបត្តិនៃគណៈកម្មាធិការអព្យាក្រឹត និងយុត្តិធម៌ដើម្បីការបោះឆ្នោតដោយសេរី និងត្រឹមត្រូវនៅកម្ពុជាឬហៅកាត់ និកហ្វិក ប្រាប់កាសែតខ្មែរថាមស៍ កាលពីម្សិលមិញថា ពាក់ព័ន្ធនឹងដំណើរការបោះឆ្នោតនៅកម្ពុជា អង្គការស៊ីវិល សមាគម បក្សនយោបាយ និងស្ថាប័ន គ.ជ.ប តែងលើកទឹកចិត្តប្រជាពលរដ្ឋគ្រប់រូបឱ្យទៅបោះឆ្នោត ដើម្បីប្រើប្រាស់សិទ្ធិរបស់ខ្លួនសម្រេចលើជោគវាសនាប្រទេសជាតិ។លោកបន្ថែមថា ចំពោះអង្គការនិកហ្វិក តែងលើកទឹកចិត្ត និងជំរុញប្រជាពលរដ្ឋទៅបោះឆ្នោតឱ្យបានច្រើន គឺកាន់តែល្អ។ប៉ុន្តែមិនមែនបង្ខិតបង្ខំ ឬទៅដាក់សម្ពាធលើពួកគេនោះទេ។លោកបញ្ជាក់ថា៖ «យើងលើកទឹកចិត្ត ដើម្បីឱ្យគាត់បញ្ចេញឆន្ទៈរបស់ខ្លួន ដើម្បីបោះឆ្នោតឱ្យបក្សនយោបាយណាដែលគាត់ស្រឡាញ់ ព្រោះជាសិទ្ធិរបស់គាត់ យើងលើកទឹកចិត្តគាត់ពិតមែន ប៉ុន្តែបើគាត់មិនទៅបោះឆ្នោតខ្លួនឯង គឺជាសិទ្ធិរបស់គាត់ ព្រោះការបោះឆ្នោតនៅស្រុកខ្មែរ លោកទៅបោះ ឬមិនទៅបោះ ក៏មិនមានបញ្ហាអ្វីដែរ»។លោកបានបន្តថា គ្មានច្បាប់ណាមួយដាក់កំហិតឱ្យប្រជាពលរដ្ឋ ត្រូវតែទៅបោះឆ្នោតនោះទេ ហើយក៏មិនបានដាក់ពិន័យ ឬជាប់ទោស ឬក៏តម្រូវឱ្យបង់ជាប្រាក់នោះដែរ។លោកនិយាយថា អ្នកដែលមិនទៅបោះឆ្នោត មិនមែនសុទ្ធតែជាក្រុមប្រឆាំងឬជាប់ពាក់ព័ន្ធនឹងលោក សម រង្ស៊ីនោះទេ។ប៉ុន្តែអ្នកខ្លះដោយសារជាប់រវល់រកស៊ី ប្រកបការងារ ឬកំពុងស្ថិតនៅតំបន់ផ្សេងឬក៏ចំណាកស្រុក។ដូច្នេះ ប្រជាពលរដ្ឋទាំងអស់ គឺមិនដូចគ្នានោះទេ ព្រោះអ្នកខ្លះមានភារកិច្ច ឬមានការចាំបាច់ដែលតម្រូវធ្វើក្នុងជីវភាពប្រចាំថ្ងៃ។គួររម្លឹកថា ការបោះឆ្នោតជ្រើសតាំងតំណាងរាស្ត្រ នីតិកាលទី៧ នឹងប្រព្រឹត្តទៅនៅថ្ងៃទី២៣ ខែកក្កដា ឆ្នាំ២០២៣។គណបក្សនយោបាយដែលមានក្នុងបញ្ជីបោះឆ្នោត នីតិកាលទី៧ របស់គណៈកម្មាធិការជាតិរៀបចំការបោះឆ្នោត គឺមានចំនួន១៨ គណបក្ស ខណៈគណបក្សភ្លើងទៀន ដែលជាគណបក្សប្រឆាំងដ៏ធំជាងគេនៅកម្ពុជា ត្រូវបានអាក់ខានចូលរួមបោះឆ្នោត ដោយសារ គ.ជ.ប ថាខ្វះខាតនីតិវិធីមួយចំនួន។គណបក្សនយោបាយទាំង១៨ ដែលឈរទៅតាមលេខរៀងផ្លូវការរបស់ គ.ជ.ប រួមមាន លេខរៀងទី១ គណបក្សសំបុកឃ្មុំដើម្បីប្រជាធិបតេយ្យ ទី២ គណបក្សខ្មែរតែមួយ ទី៣ គណបក្សសញ្ជាតិកម្ពុជា ទី៤ គណបក្សខ្មែររួបរួមជាតិ ទី៥ គណបក្សកម្លាំងប្រជាធិបតេយ្យ ទី៦ គណបក្សកសិករ ទី៧ គណបក្សស្ត្រីដើម្បីស្ត្រី ទី៨ គណបក្សខ្មែរឈប់ក្រ ទី៩ គណបក្សហ្វ៊ុនស៊ីនប៉ិច ទី១០ គណបក្សធម្មាធិបតេយ្យ។ក្រៅពីនេះ លេខរៀងទី១១ គណបក្សប្រជាធិបតេយ្យមូលដ្ឋាន ទី១២ គណបក្សបំណងពលរដ្ឋ ទី១៣ គណបក្សអភិវឌ្ឍន៍សេដ្ឋកិច្ច ទី១៤ គណបក្សឯកភាពជាតិខ្មែរ ទី១៥ គណបក្សខ្មែរអភិរក្ស ទី១៦ គណបក្សយុវជនកម្ពុជា ទី១៧ គណបក្សជនជាតិដើមប្រជាធិបតេយ្យកម្ពុជា និងទី១៨ គណបក្សប្រជាជនកម្ពុជា៕Khmer Times
/unnamed.png
Post a Comment