ប្រមុខដឹកនាំកម្ពុជា៖គ្មានជំនឿណាមួយថាអ៊ុយក្រែនអាចវាយយកទឹកដីដែលរុស្ស៊ីកាន់កាប់មកវិញបានទេ
ប្រមុខរាជរដ្ឋាភិបាលកម្ពុជាសម្តេចហ៊ុន សែនបានគូសបញ្ជាក់ថា សម្តេចគ្មានជំនឿណាមួយថាអ៊ុយក្រែនអាចវាយយកទឹកដីដែលរុស្ស៊ីកាន់កាប់នោះបានមកវិញដោយសារការប្រើកម្លាំងត្រឹមប៉ុណ្ណឹងនោះទេ។
ការគូសបញ្ជាក់របស់សម្តេចបែបនេះក្នុងពិធីសំណេះសំណាលជាមួយកម្មករ-កម្មការិនីជិត២ម៉ឺននាក់មកពីរោងចក្រសហគ្រាសចំនួន៩នៅខណ្ឌពោធិ៍សែនជ័យ រាជធានីភ្នំពេញ នាព្រឹកថ្ងៃទី ១៤ ខែមិថុនា ឆ្នាំ ២០២៣។សម្ដេចហ៊ុន សែនបានថ្លែងថា៖ «អ៊ុយក្រែនចាប់ផ្ដើមវាយបកទៅលើរុស្ស៊ី។ប៉ុន្ដែខ្ញុំគ្មានជំនឿណាមួយនិយាយតាមមួយបែបទៅគ្មានជំនឿណាមួយថាអ៊ុយក្រែនអាចវាយយកទឹកដីដែលរុស្ស៊ីកាន់កាប់នោះបានមកវិញ ដោយសារកម្លាំងត្រឹមប៉ុណ្ណឹងទេ»។ សម្ដេចបានរម្លឹកថា កាលពីថ្ងៃមុនពេលជួបប្រធានាធិបតីអ៊ុយក្រែនតាមវីដេអូសម្ដេចក៏បានចោទសួរទៅគាត់ថាតើឯកឧត្ដមមានគម្រោងនឹងវាយយកទឹកដីត្រឡប់មកវិញទេ។ឯកឧត្ដមប្រធានាធិបតីគាត់ឆ្លើយថាពិតជាមាន។ សម្ដេចនាយករដ្ឋមន្រ្ដីថ្លែងបញ្ជាក់ថា៖«ខ្ញុំមិនបានលើកទឹកចិត្ដឱ្យមានការវាយប្រហារទេ ខ្ញុំគ្រាន់តែនិយាយសំដៅទៅគាត់ថាគួរតែរកវិធីសន្ទនាដើម្បីដោះស្រាយ»។សម្ដេចបានអះអាងថា ឥឡូវមិនអាចនរណាទៅរារាំងអ៊ុយក្រែនទៅវាយទៅលើរុស្ស៊ីនោះទេ ។ក៏ប៉ុន្ដែសម្ដេចគ្មានជំនឿថាការប្រើប្រាស់សង្គ្រាមដើម្បីបញ្ចប់សង្រ្គាម ដើម្បីដណ្ដើមទឹកដីហើយរុស្ស៊ីក៏មិនចុះចាញ់ទៅលើតំបន់ដែលខ្លួនកំពុងកាន់កាប់នោះទេ ជាពិសេសតំបន់គ្រីមៀនិងតំបន់ដុនបាស់។ សម្ដេចបានសង្កត់ធ្ងន់ថា៖ ខ្ញុំអត់មានជំនឿទេ ទោះបីអាម៉េរិក និងលោកខាងលិចផ្ដល់អាវុធឱ្យប៉ុណ្ណាក៏ដោយក៏ទៅមិនរួចដែរ ព្រោះនៅទីនោះគេក៏មានកម្លាំងហើយវាយទៅវាយមក ទីចុងបំផុតអ្នកដែលស្លាប់គឺប្រជាជនអ៊ុយក្រែននិងរុស្ស៊ីតែប៉ុណ្ណឹង»។ជាមួយគ្នានេះដែរ សម្តេច ហ៊ុន សែន ក៏បានអំពាវនាវដល់កម្មករ កម្មការិនី និងប្រជាពលរដ្ឋទាំងអស់ ត្រូវចូលរួមការពារសន្ដិភាពក្នុងពេលដែលយើងមានសន្ដិភាពហើយ ដើម្បីកុំឱ្យបាត់បង់ខណៈពេលដែលបាត់បង់សន្ដិភាព ទើបស្រែករកសន្តិភាពគឺវាយឺតពេលហើយ៕AKP
/unnamed.png
Post a Comment