ការស្ទង់​មតិបានបង្ហា​ញថារា​ជរដ្ឋាភិបាលកម្ពុ​ជា​កំពុងដើរលើផ្លូវដ៏ត្រឹម​ត្រូវ

  ប្រមុខរាជរដ្ឋាភិបាលកម្ពុជាសម្ដេចហ៊ុន សែន មាន​ប្រសាសន៍​ថា  ការស្ទង់មតិដោយជនបរទេសជាបន្តបន្ទាប់បានបង្ហាញថា រាជរដ្ឋាភិបាលកម្ពុជាកំពុងដើរលើផ្លូវដ៏ត្រឹមត្រូវ។

ប្រមុខរាជរដ្ឋាភិបាលកម្ពុជាសម្ដេចហ៊ុន សែន។រូបភាពតេលេក្រាមសម្តេចហ៊ុនសែន

ក្នុងពិធីបន្តជួបសំណេះសំណាលជាមួយ កម្មករ និយោជិតសរុបប្រមាណ ​៦ ៨៦៨ នាក់ មកពីរោងចក្រ សហគ្រាសចំនួន ១០ ក្នុងខេត្តពោធិ៍សាត់ នាព្រឹកថ្ងៃទី៣០ ខែមិថុនា ឆ្នាំ២០២៣ នៅឃុំស្នាអន្សា ស្រុកក្រគរ ខេត្តពោធិ៍សាត់ សម្ដេចតេជោ ហុន សែន មាន​ប្រសាសន៍ថា៖ «អ្វីដែលយើងបានធ្វើនឹងកំពុងដើរត្រូវ ទិសហើយៗ ការស្ទង់មតិចុងក្រោយ​បំផុត ខ្ញុំមិនបង្ហាញនូវទិន្នន័យទេ។ ប៉ុន្តែកម្ពុជា បានធ្វើការស្ទង់មតិ ខែមករា ឆ្នាំ២០២២ ខែតុលា ឆ្នាំ២០២២ ខែមករា ឆ្នាំ២០២៣ ខែមេសា ឆ្នាំ២០២៣ និងខែមិថុនា ឆ្នាំ២០២៣ ប៉ុន្មានថ្ងៃមុននេះ ទើបនឹងចេញមក។ អីចឹងចំណុចដែលសួរទាក់ទងនឹងការដើរត្រូវ របស់​រាជរដ្ឋាភិបាល គឺមានចំនួនភាគរយខ្ពស់ខ្លាំងណាស់ ចំណុចដើរខុស គឺវានៅសេសសល់ ហើយមិនមែនជាការដើរខុសទេ គឺវាជាភាពទន់ខ្សោយ។ ឧទាហរណ៍ ទាក់ទងនឹងបញ្ហា​គ្រឿង​ញៀន ទាក់ទងនឹងបញ្ហា អសកម្ម មួយចំនួន ក៏នៅមាន»។សម្ដេចគូសបញ្ជាក់ថា  បញ្ហាទន់ខ្សោយទាំងនោះ ត្រូវបានរកឃើញ តាម​រយៈ​ការស្ទង់មតិ ហើយការស្ទង់មតិនេះ មិនមែនជាជនជាតិខ្មែរ អ្នកធ្វើនោះទេ គឺជនជាតិ​បរទេសមកធ្វើការស្ទង់មតិ។ តាមរយៈការស្ទង់មតិនោះទៀតសោត បានបង្ហាញថា អ្នក​បោះឆ្នោតឱ្យគណបក្សប្រជាជន ភាគច្រើន ជាមនុស្សស្រី។លោកអ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានឱ្យដឹងថា រោងចក្រ សហគ្រាសទាំង១០ ដែលអនុញ្ញាតឱ្យកម្មករ និយោជិត ចូលរួម​សំណេះសំណាលជាមួយសម្តេចតេជោ មានទីតាំងនៅក្រុងពោធិ៍សាត់ចំនួន១ ស្រុកក្រគរ​ចំនួន៨ និងស្រុកបាកានចំនួន១។ រោងចក្រទាំង១០នេះ មានរោងចក្រកាត់ដេរសម្លៀក​បំពាក់ចំនួន៣ ផលិតគ្រឿងអេឡិចត្រូនិចចំនួន៥ ដំឡើងរថយន្តចំនួន១ និងផលិតផល​កសិកម្ម​ចំនួន១។ ខេត្តពោធិ៍សាត់ គឺជាខេត្តមួយ ដែលកំពុងទទួលនូវមនុញ្ញ​ផលពីគោល​នយោបាយ ពង្រាយរោងចក្រ សហគ្រាសតាមបណ្តាខេត្តពីរាជរដ្ឋាភិបាល។​នៅឆ្នាំ​២០២៣នេះ ខេត្តពោធិ៍សាត់ មានរោងចក្រ សហគ្រាសចំនួន២០៩ មានកម្មករ និយោជិត​ប្រមាណ ១ម៉ឺននាក់ ទទួលបានប្រាក់ឈ្នួលមធ្យមសរុបប្រមាណ ៣១លានដុល្លារអាម៉េរិក​ក្នុងមួយឆ្នាំ។ ក្នុងនោះរោងចក្រ សហគ្រាសក្នុងវិស័យកាត់ដេរចំនួន៣ មានកម្មករ និយោ​ជិត​សរុបជាង ៦ពាន់នាក់ ទទួលបានប្រាក់ឈ្នួលមធ្យមសរុបប្រមាណជិត ១៧លាន​ដុល្លារ​អាម៉េរិកក្នុងមួយឆ្នាំ។ ខេត្តពោធិ៍សាត់ ជាខេត្តទី១៣ ដែលមានការអភិវឌ្ឍរោងចក្រ សហ​គ្រាសច្រើនក្នុងវិស័យកាត់ដេរ រួមទាំងកម្មន្តសាល ស្ថានីយ៍ផលិតថាមពលអគ្គិសនីដោយ​ពន្លឺព្រះ​អាទិត្យ និងវារីអគ្គិសនី។ល៕AKP