នាយករដ្ឋម​ន្រ្តី​​ព្រមានប្រទេ​​​ស​​ណាដែ​​លឱ្យដ្រូនធ្វើសកម្មភា​​ពឈ្លាន​ពាន​កម្ពុជា​​នឹងប្ដឹងទៅ​អ​ង្គកា​រស​ហប្រជាជា​តិ

 សម្ដេចហ៊ុន សែននាយករដ្ឋមន្រ្តីនៃកម្ពុជាបានព្រមាន​ប្រទេស​ណាក៏ដោយ ដែលផ្ដល់ឱកាសឱ្យយន្តហោះគ្មានមនុស្សបើក(ដ្រូន)មកធ្វើ​សកម្ម​ភាព​​ឈ្លានពានកម្ពុជានិងធ្វើភេរវកម្មលើទឹកដីកម្ពុជាបើស៊ើបអង្កេតបាន នឹងប្ដឹងទៅ​អង្គការ​សហប្រជាជាតិ។

ប្រធាន​ក្រុម​អង្គរក្ស​ផ្ទាល់របស់សម្តេចហ៊ុន សែន គឺ​លោក ហ៊ីង ប៊ុនហៀង បង្ហាញ​កាំភ្លើង​ និង​ត្រៀមទ័ព​ទៅ​ខេត្ត​រតនគិរី ។TVK/RFA

ក្នុងឱកាសបន្តចុះជួបកម្មករ កម្មការិនី ជិត២ម៉ឺននាក់នៅតំបន់ព្រៃស្ពឺ ក្នុងខណ្ឌ​ពោធិ៍សែនជ័យ រាជធានីភ្នំពេញ នាព្រឹកថ្ងៃទី២៨ ខែមិថុនា ឆ្នាំ២០២៣ សម្ដេចហ៊ុន សែន បានបញ្ជាដាច់ណាត់ឱ្យកងទ័ពកម្ពុជាបាញ់ទម្លាក់យន្តហោះដ្រូន ដែលបង្ហោះ​រំលោភ​ចូលដែនអធិបតេយ្យភាពកម្ពុជានៅព្រះដែនកម្ពុជា-វៀតណាម ក្នុងភូមិសាស្រ្ត​ខេត្ត​រតនគីរី មណ្ឌលគីរី និងខេត្តក្រចេះ ឱ្យបាន ទោះត្រូវចំណាយអស់គ្រាប់ឬប្រាក់ប៉ុន្មាន​ក៏ដោយ ព្រោះជាសន្តិសុខជាតិ។ សម្ដេចបានបញ្ជាឱ្យអគ្គមេបញ្ជាការកងយោធពល​ខេមរភូមិន្ទ ដំឡើងអាវុធគ្រប់ធុនទាំងអស់នៅយោធភូមិភាគទី១ដើម្បីបាញ់កម្ទេចយន្ត​ហោះ​​​គ្មានមនុស្សបើក ដែលយប់មិញនេះបានហោះមកចំនួន៥គ្រឿងទៀត ។ក៏ប៉ុន្តែ​គ្មាន​ការផ្ទុះអាវុធដើម្បីបាញ់កម្ទេចនោះទេ។ សម្ដេចថ្លែងដូច្នេះថា៖«អស់លោកធ្វើ​មេទ័ព​ស្លូតពេកហើយគេហោះចូលដីយើងប៉ុន្មានថ្ងៃហើយអស់លោកត្រឹមតែយកកាំភ្លើងCKC បាញ់កាំភ្លើងទៅណាអស់ទៅអាធុនធំនោះ»។ សម្ដេចបន្តថា ឥឡូវកាំជ្រួចសម្រាប់​បាញ់​យន្តហោះឡើងទៅហើយ ដូច្នេះចាប់ពីយប់នេះទៅបើមានហោះចូលទៀតត្រូវ​បាញ់​កម្ទេចតែម្ដង។ ដូច្នេះត្រូវពង្រាយសំណាញ់មេឃដើម្បីកម្ទេចដោយចំណាយ១លាន ឬ២​លាន​គ្រាប់ចោលទៅវាគង់អីនឹងត្រូវ។ សម្ដេចបានបញ្ជាក់ថា អ្នកណា ឬ កម្លាំង​អង្គភាពណាបាញ់ដ្រូនធ្លាក់១គ្រឿង សម្ដេចនឹងជូនថវិកា ចំនួន២០ម៉ឺន​ដុល្លារ​អាម៉េរិកដោយសម្ដេចចង់ដឹងថាតើយន្តហោះគ្មានមនុស្សបើក(ដ្រូន) នេះវាចេញមក​ពីណា​ពិតប្រាកដព្រោះវាបានហោះចូលមកកម្ពុជា ជិត១សប្ដាហ៍មកហើយ។ សម្ដេចក៏បានស្នើឱ្យប្រជាពលរដ្ឋកុំព្រួយបារម្ភចំពោះសភាពការណ៍នេះ ព្រោះ​សង្គ្រាមវាមិនផ្ទុះទេហើយសម្ដេចជឿថាកម្លាំងដែលបាក់ទ័ពរត់ចេញពីប្រទេស​វៀត​ណាមមកនៅក្នុងដីខ្មែរ ហើយយន្តហោះគ្មានមនុស្សបើក(ដ្រូន) នេះ វាមកធ្វើ​ទំនាក់​ទំនង​ជាមួយពួកនេះឯង។ សម្ដេចក៏បានបញ្ជាក់ជូនជនរួមជាតិដែរថា៖«នេះហើយដែល​អាមេក្បត់ជាតិ៣ជំនាន់ បានចុះហត្ថលេខាជាមួយកុក ស (ពួករដ្ឋដេហ្គា) ដែលកាត់ដី​ខេត្ត​ចំនួន៤នៅភូមិភាគឦសានរបស់កម្ពុជាទៅឱ្យពួកនេះ ក្រោមហេតុផលជនជាតិដើម​ភាគ​តិច»។សម្ដេចបានព្រមានម្ដងហើយម្ដងទៀតចំពោះអ្នកដែលពាក់ព័ន្ធជាមួយ​ជន​ក្បត់​ជាតិនេះត្រូវតែមានវិធានការ។ជាមួយគ្នានេះដែរសម្ដេចក៏បានដាក់ការ​សង្ស័យ​ចំពោះ​យន្តហោះគ្មានមនុស្សបើក ដែលចូលមកក្នុងទឹកដីកម្ពុជា ទៅលើចំណុច២ទី១គឺចេញពីប្រទេសមួយ ឯទី២គឺចេញពីនាវា ដើម្បីហោះចូលកម្ពុជាហើយពួកនេះ​ហ្វឹក​ហាត់នៅក្នុងប្រទេសមួយ។ ដូចនេះយើងត្រូវពិនិត្យមើលព្រោះថានេះជាការបំពាន​ទាំង​ស្រុងលើអធិបតេយ្យភាពរបស់កម្ពុជា។សម្ដេចប្រមុខរាជរដ្ឋាភិបាល  ក៏បានអំពាវនាវដល់ប្រទេសនានាពិនិត្យមើលនេះជាការបំពានទាំងស្រុងលើឯករាជ្យ អធិបតេយ្យភាពរបស់កម្ពុជា។ ដោយសម្ដេច​តេជោ​មានប្រសាសន៍ថា៖ «យើងសួរទៅវៀតណាមៗ អត់ទាំងដឹងផង ហើយវៀតណាមគាត់មាន​ផល​ប្រយោជន៍អីនឹងការបង្ហោះដ្រូនមក ដោយមិនជូនដំណឹងឱ្យកម្ពុជាហើយត្រូវចូល​មក​កម្ពុជា ព្រោះកម្ពុជាមានសមត្ថភាពដើម្បីរុករកជួយពួកគាត់ហើយ បើគាត់ហោះ ហោះតែ​ក្នុងដីគាត់ទៅ។ប៉ុន្តែខ្ញុំជឿថាមិនមែនរបស់វៀតណាមទេ»៕AKP

​