នាយ​ក​រដ្ឋមន្រ្តីហ៊ុ​ន សែន៖​ការធ្វើវិ​សោធន​​​កម្មច្បាប់ស្ដីពីការបោះឆ្នោត​មិនមាន​កា​រ​ផ្ទុយ​ពី​រដ្ឋ​ធម្មនុញ្ញា

សម្ដេចហ៊ុន សែននាយករដ្ឋមន្រ្តីនៃកម្ពុជាមាន​ប្រសាសន៍​ថាការធ្វើវិសោធនកម្មច្បាប់ស្ដីពីការបោះឆ្នោតមិនមានការផ្ទុយពីរដ្ឋធម្មនុញ្ញានៃ​ព្រះរាជា​ណាចក្រកម្ពុជានោះឡើយ។

រូបឯកសារ៖ សម្តេច​នាយករដ្ឋមន្រ្តី​ហ៊ុន សែន​ បង្ហាញ​ម្រាមដៃ​ជាប់​ទឹកខ្មៅ​ បន្ទាប់​ពី​ចូលរួម​បោះឆ្នោត​ក្នុង​ការ​បោះឆ្នោត​ឃុំ​សង្កាត់​ នៅ​មណ្ឌល​បោះឆ្នោត​ក្រុង​តាខ្មៅ ខេត្ត​កណ្តាល កាល​ពី​ថ្ងៃ​ទី០៤​ ខែ​មិថុនា ឆ្នាំ​២០១៧។(AP/VOA)

ក្នុងខណៈបន្តអញ្ជើញចុះជួបសំណេះសំណាលជាមួយកម្មករ កម្មការិនីសរុបជិត២​ម៉ឺននាក់ មកពីរោងចក្រ សហគ្រាសចំនួន១១ នៅខណ្ឌពោធិ៍សែនជ័យ រាជធានីភ្នំពេញ នាព្រឹកថ្ងៃទី ១៣ ខែមិថុនា ឆ្នាំៗ០២៣ សម្ដេចហ៊ុន សែន បានគូសបញ្ជាក់ថាការ​ធ្វើ​​វិសោធនកម្មច្បាប់បោះឆ្នោតគឺដើម្បីបង្កើនការទទួលខុសត្រូវចំពោះអ្នកឈរឈ្មោះឱ្យ​ប្រ​ជា​ពលរដ្ឋ​បោះឆ្នោតឱ្យពីព្រោះបើអ្នកឈរឈ្មោះឱ្យគេបោះឆ្នោតសូម្បីសិទ្ធិពលរដ្ឋ​ដែ​ជាសិទ្ធិទៅបោះឆ្នោតមិនអាចធ្វើបានផងតើនឹងអាចដឹកនាំប្រទេសកម្ពុជា បានដោយ​របៀបណា។សម្ដេចថ្លែងបន្តថាការធ្វើវិសោធនកម្មច្បាប់បោះឆ្នោត ដកសិទ្ធិឈរ​ឈ្មោះឱ្យគេបោះឆ្នោតសម្រាប់បុគ្គលណាដែលមិនទៅបោះឆ្នោត គឺដើម្បីពង្រឹងនិង​លើក​កម្ពស់ការទទួលខុសត្រូវរបស់មេដឹកនាំទាំងថ្នាក់ជាតិ និងថ្នាក់ក្រោមជាតិហើយការធ្វើ​វិសោធនកម្មច្បាប់នេះមិនមានផ្ទុយពីរដ្ឋធម្មនុញ្ញានៃព្រះរាជាណាចក្រកម្ពុជានោះឡើយ។ សម្ដេចក៏បានស្នើដល់ប្រធានព្រឹទ្ធសភា និងប្រធានរដ្ឋសភា ដើម្បីជួយដល់​រាជរដ្ឋាភិ​បាល ក្នុងការស្នើធ្វើវិសោធនកម្មច្បាប់ស្ដីពីការបោះឆ្នោត ទាំងការបោះឆ្នោតសកលនិង​អសកល។សម្ដេចហ៊ុន សែន បានមានប្រសាសន៍យ៉ាងដូច្នេះថា៖ «ខ្ញុំសំណូមពរសម្ដេច​ប្រធានរដ្ឋសភា សម្ដេចប្រធានព្រឹទ្ធសភាមេត្ដាជួយដល់រាជរដ្ឋាភិបាល ក្នុងសំណើធ្វើ​វិសោធន​កម្មច្បាប់បោះឆ្នោតទាំងអស់ទាំងបោះឆ្នោតតំណាងរាស្ដ្រ បោះឆ្នោតព្រឹទ្ធសភា បោះឆ្នោតក្រុមប្រឹក្សាឃុំសង្កាត់ បោះឆ្នោតអសកលនានាគឺធ្វើទាំងអស់ ហើយ​ថែមតែ​មួយ​ចំណុចប៉ុណ្ណោះ សិទ្ធិដែលមិនបានឈរឈ្មោះឱ្យគេបោះឆ្នោតគឺមិនបានទៅបោះឆ្នោត​កន្លង​ផុតទៅ»។ សម្ដេចនាយករដ្ឋមន្រ្ដីលើកឡើងថាគំនិតផ្ដួចផ្ដើមរបស់សម្ដេច​ក្នុង​ការស្នើធ្វើវិសោធនកម្មច្បាប់ស្ដីពីការបោះឆ្នោតនេះ ដោយសារមើលឃើញគំរូរបស់​ប្រទេស​ថៃដែលបានអនុវត្តន៍បែបនេះ ដោយតំណាងរាស្ដ្ររបស់គណបក្សមួយ​នៅ​ប្រទេស​ថៃត្រូវបានដកហូតសិទ្ធិដោយសារមិនបានទៅចូលរួមបោះឆ្នោត នោះមានន័យថាមិនអាចឈរឈ្មោះឱ្យគេបោះឆ្នោតឱ្យខ្លួនបានឡើយ។ ប៉ុន្ដែទោះជាយ៉ាងណាសម្ដេច​​បានបន្ថែមថា  មិនជ្រៀតជ្រែកចូលកិច្ចការផ្ទៃក្នុងរបស់ប្រទេសដទៃនោះឡើយ ដោយ​ទាំងអស់នេះ គ្រាន់តែជាព័ត៌មានដែលសម្ដេចទទួលបានតែប៉ុណ្ណោះ។ក្នុងឱកាសនេះសម្ដេចក៏បន្តជំរុញដល់សម្ដេចស ខេង ឧប​នាយក​រដ្ឋមន្រ្ដីរដ្ឋមន្រ្ដីក្រសួងមហាផ្ទៃ និងលោកកើត រិទ្ធ រដ្ឋមន្រ្ដីក្រសួងយុត្តិធម៌ ពន្លឿនការធ្វើវិសោធនកម្មច្បាប់ដើម្បីដាក់ទៅរដ្ឋសភាអនុម័តនៅមុនការបោះ​ឆ្នោតជ្រើស​តាំងតំណាងរាស្រ្ដនីតិកាលទី៧ នាខែកក្កដា ឆ្នាំ២០២៣ ខាងមុខនេះ៕AKP