កម្ពុជា​​-​ចិន​​​ជំរុញ​កិច្ច​សហ​ប្រតិ​បត្តិ​វិ​ស័​យ​​យោ​ធា​ឱ្យ​កាន់តែ​​​រឹង​មាំ​

 ក្រសួង​ការពារ​ជាតិ​កម្ពុជានិង​ក្រសួង​ការពារ​ជាតិ​ចិន​ ​បាន​ប្ដេជ្ញា​ជំរុញ​កិច្ច​សហប្រតិបត្តិការ​វិ​ស័យ​យោធា​​និង​កងទ័ព​ដើម្បី​ឱ្យ​ទំនាក់​ទំនង​ប្រទេស​ទាំងពីរ​នេះ​ ​កាន់តែ​រឹង​មាំ​ ​មាន​ប្រសិទ្ធ​ភាព​ ​និង​ប្រព្រឹត្តទៅ​ដោយ​រលូន​បន្ថែម​ទៀត​ទាំង​បច្ចុប្បន្ន​ ​និង​អនាគត​។​​ការ​ប្ដេជ្ញា​ជំរុញ​កិច្ច​សហប្រតិបត្តិការ​វិ​ស​័​យ​យោធា​ ​និង​កងទ័ព​ ​រវាង​ភាគី​ទាំង​ពីរ​នេះ​ ​ធ្វើឡើង​ក្នុងកំលុង​ពេល​ចូលរួម​កិច្ចប្រជុំ​កំពូល​សន្តិសុខ​អាស៊ី​ ​លើក​ទី​២​០​ ​ចាប់ពី​ថ្ងៃ​ទី​២​ ​ដល់​ថ្ងៃ​ទី​៤​ ​ខែ​មិថុនា​ ​ឆ្នាំ​២​០​២​៣​ ​នៅ​ប្រទេស​សិង្ហបុរី​។​ក្នុង​កិច្ចប្រជុំ​កំពូល​សន្តិសុខ​អាស៊ី​ ​នៅ​ប្រទេស​សិង្ហបុរី​ ​លោក​ ​ទៀ​ ​បាញ់​ ​រដ្ឋមន្ត្រី​ក្រសួង​ការពារ​ជាតិ​ ​បាន​ជួប​ប្រជុំ​ទ្វេភាគី​ជាមួយ​លោក​ ​លី​ ​សាងហ្វូវ(​L​i​ S​hang​f​u) ​រដ្ឋមន្ត្រី​ក្រសួង​ការពារ​ជាតិ​ចិន​ ​កាលពី​ថ្ងៃសុក្រ​ ​ដោយ​ភាគី​ទាំង​ពីរ​បាន​សន្យា​ពង្រឹង​កិច្ច​សហប្រតិបត្តិការ​រវាង​កងទ័ព​កម្ពុជា​ ​និង​ចិន​ ឱ្យ​កាន់តែ​មាន​ប្រសិទ្ធ​ភាព​ ​និង​រឹង​មាំ​បន្ថែម​ទៀត​។​លោក​ ​លី​ ​សាង​ហ្វ៊ូ ​បាន​លើកឡើង​ថា​ ​ចំពោះ​កិច្ច​សហប្រតិបត្តិការ​នេះ​ ​គឺ​ធ្វើ​ឡើង​ទាំង​កិច្ច​សន្ទនា​រវាង​កងទ័ពជើងគោក​ ​និង​បង្កើន​កិច្ច​សហប្រតិបត្តិការ​ក្នុង​ក្រប​ខណ្ឌ​អា​ស៊ាន​ ​ជាពិសេស​ ​កិច្ច​សហប្រតិបត្តិការ​ ​ដើម្បី​ជំរុញ​ឱ្យ​មាន​សន្តិភាព​ ​និង​ស្ថេរ​ភាព​នៅ​ក្នុង​តំបន់​។​លោក​បន្ត​ថា​ ​ដំណើរ​ក្នុង​កិច្ចប្រជុំ​នៅ​សិង្ហបុរី​នេះ​ ​ក្នុងនាម​ជា​ក្រសួង​ការពារ​ជាតិ​ចិន​ ​លោក​នឹង​ធ្វើ​បទ​បង្ហាញ​ពី​ ​គំនិត​ផ្តួចផ្តើម​សន្តិសុខ​សាកល​ថ្មី​របស់​ប្រទេស​ចិន​។​ ​បទ​បង្ហាញ​នេះ​ ​គឺ​ផ្តោត​សំខាន់​ទៅលើ​គោលគំនិត​ ​ការ​កសាង​សហគមន៍​ ​ជោគវាសនា​រួម​របស់​មនុស្សជាតិ​ ​ជាពិសេស​ ​បញ្ហា​កសាង​សហគមន៍​ ​កសាង​ជោគវាសនា​រួម​អាស៊ី​ប៉ាស៊ីហ្វិក​ ​និង​សហគមន៍​សន្តិសុខ​អាស៊ី​ ​ផង​ដែរ​។​​លោក​ ​ទៀ​ ​បាញ់​ ​បាន​ថ្លែង​ថា​ ​ចំពោះ​កិច្ច​សហប្រតិបត្តិការ​រវាង​កងទ័ព​កម្ពុជា​ ​និង​ចិន​ ​កាលពី​កន្លងទៅ​ ​គឺ​មាន​កិច្ច​សហប្រតិបត្តិការ​យ៉ាង​ជិត​ស្និត​ ​និង​បាន​នាំមក​នូវ​ការ​រីក​ចម្រើន​ដល់​កងទ័ព​ទាំង​ពី​​​រ​កាន់តែ​ល្អ​ប្រសើរ​។​លោក​បាន​បន្ថែម​ថា​ ​កាល​កិច្ចប្រជុំ​រដ្ឋមន្ត្រីការពារជាតិ​អា​ស៊ាន​បូក​នៅ​កម្ពុជា​ ​កាល​ពី​ឆ្នាំ​២០២២​ ​បាន​ប្រព្រឹត្ត​ទៅ​ដោយ​រលូន​ ​និង​ទទួល​បាន​ជោគជ័យ​ខ្ពស់​ ​ក្នុង​នោះ​ ​ក៏​មានការ​រួមចំណែក​ដ៏​ធំ​ពី​មិត្ត​ចិន​ ​ដែល​បាន​ជួយ​ដល់​កម្ពុជា​លើ​មធ្យោបាយ​ដឹកជញ្ជូន​ផង​ដែរ​។​លោក​ ​ទៀ​ ​បាញ់​ ​បន្ត​ថា​ ​កម្ពុជា​ ​នឹង​បន្ត​ពង្រឹង​កិច្ច​សហប្រតិបត្តិការ​ជាមួយ​កង​ទ័ព​រំដោះ​ប្រជាជន​ចិន​ ឱ្យ​កាន់តែ​ជិត​ស្និត​ ​និង​រឹង​មាំ​បន្ថែម​ទៀត​។​ ​លោក​ក៏​បាន​អញ្ជើញ​ ​លោក​ ​លី​ ​សាង​ហ្វ៊ូ ​ដើម្បី​បំពេញ​ទស្សនកិច្ច​ផ្លូវការ​ ​នៅ​កម្ពុជា​នា​ពេល​សមស្រប​ណាមួយ​ផង​ដែរ​។​​កាលពី​ថ្ងៃសុក្រ​ ​លោក​ ​ទៀ​ ​បាញ់​ ​ក៏​បាន​ជួប​ប្រជុំ​ទ្វេភាគី​ជាមួយ​លោក​T​h​e​ ​H​on ​Rich​ar​d​ ​M​P​ ​រដ្ឋមន្ត្រី​ក្រសួង​ការពារ​ជាតិ​អូ​ស្រា​លី​ ​ដើម្បី​ពិភាក្សា​ការទូត​រវាង​ប្រទេស​ទាំងពីរ​ផង​ដែរ។​ ​រដ្ឋមន្ត្រី​ក្រសួង​ការពារ​ជាតិ​អូ​ស្រា​លី​ ​បាន​សម្ដែង​ការ​សាទរ​ចំពោះ​លោក​ ​ទៀ​ ​បាញ់​ ​ដែល​បាន​ដឹកនាំ​កិច្ចប្រជុំ​រដ្ឋមន្ត្រី​ការពារជាតិ​អា​ស៊ាន​បូក​(​A​D​M​M​-​Plus​) ​កាលពី​កន្លងទៅ​ទទួល​បាន​ជោគជ័យ​។​លោក​បញ្ជាក់​ថា​ ​កិច្ចប្រជុំ​រដ្ឋមន្ត្រី​ការពារ​ជាតិ​អា​ស៊ាន​បូក​កាល​ពី​ឆ្នាំ​២០២២​ ​គឺ​ផ្តល់​អត្ថប្រយោជន៍​ ​និង​ខ្លឹមសារ​ជាច្រើន​សម្រាប់​អូ​ស្រ្តា​លី​ ​ដែល​មាន​ឱកាស​ជួប​ជាមួយ​ដៃគូ​ ​និង​មិត្ត​ភក្ដិ​ក្នុង​តំបន់​ជាច្រើន​។​​លោក​ ​ទៀ​ ​បាញ់​ ​ថ្លែង​ថា​ ​ចំពោះ​កិច្ច​ប្រជុំ​រដ្ឋមន្ត្រីការពារជាតិ​អា​ស៊ាន​បូក​ ​កម្ពុជា​ទទួល​បាន​លទ្ធផល​ល្អ​ ​និង​ជា​ឱកាស​មួយ​ ​ដែល​កម្ពុជា​បាន​ជួបជុំ​ជាមួយ​រដ្ឋមន្ត្រីការពារជាតិ​អា​ស៊ាន​ ​និង​ប្រទេស​បូក​ទាំងអស់​។​ ​ចំពោះ​កិច្ចប្រជុំ​កំពូល​សន្តិសុខ​អាស៊ី​ ​លើក​ទី​២​០​ ​ក៏​ជា​វេទិកា​កិច្ចប្រជុំ​កំពូល​មួយ​ ​ដែល​បាន​ផ្តល់​ឱកាស​យ៉ាង​ច្រើន​ ​ជាពិសេស​ ​ការ​ជួបជុំ​ ​និង​ស្ដាប់​បញ្ហា​កើតឡើង​នានា​របស់​បណ្ដា​ប្រទេស​ចូលរួម​ប្រជុំ​នៅ​ប្រទេស​សិង្ហបុរី​៕Khmer Times

ក ទៀ បាញ់ រដ្ឋមន្ត្រីក្រសួងការពារជាតិ និងលោក លី សាងហ្វ៊ូ រដ្ឋមន្ត្រីក្រសួងការពារជាតិចិនជួបប្រជុំទ្វេភាគីនៅសិង្ហបុរី ។