លោកញឹក ប៊ុនឆៃប្រកាសឈប់ធ្វើនយោបាយបើគណបក្សមិនទទួលបានកៅអី
លោកញឹក ប៊ុនឆៃប្រធានគណបក្សខ្មែររួបរួមជាតិប្រកាសឈប់ធ្វើនយោបាយ និងលាលែងតំណែងប្រធានគណបក្សបើគណបក្សរបស់លោកមិនទទួលបានអាសនៈឬកៅអី នៅក្នុងការបោះឆ្នោតជ្រើសតាំងតំណាងរាស្ត្រនាខែកក្កដាខាងមុខនេះ។ក្នុងវគ្គបណ្ដុះបណ្ដាលដល់បេក្ខជនតំណាងរាស្រ្តស្ដីពី អាថ៌កំបាំងក្នុងការធ្វើនយោបាយ កាលពីថ្ងៃអាទិត្យ លោក ញឹក ប៊ុនឆៃ បានលើកឡើងថា រូបលោកនិងថ្នាក់ដឹកនាំគណបក្សទាំងអស់បានប្ដេជ្ញាខ្ពស់ ដើម្បីឱ្យលទ្ធផលបោះឆ្នោតទទួលបានជោគជ័យនិងមានអាសនៈនៅក្នុងសភា។លោកបានបន្ថែមឱ្យដឹងថា សម្រាប់ការបោះឆ្នោតនៅឆ្នាំនេះ លោកមានឱកាសតែមួយអាណត្តិនេះទេបើមិនទទួលបានអាសនៈទេ លោកនឹងឈប់ដឹកនាំគណបក្ស ហើយប្រគល់កិច្ចការដឹកនាំគណបក្សទៅអ្នកផ្សេងដឹកនាំជំនួសវិញ។លោកបញ្ជាក់ថា៖ «បើអត់កើតទេ (ខ្ញុំ)សម្រាកឱ្យអ្នកដឹកនាំថ្មី ដើម្បីដឹកនាំបន្ត ព្រោះ (ខ្ញុំ) ប្ដេជ្ញាលើកនេះគឺប្ដេជ្ញាខ្លាំង ធ្វើយ៉ាងណាក៏ដោយប្រឹងប្រែង [,,,] ដោះស្រាយឱ្យបានហើយឱកាសល្អរបស់គណបក្សខ្មែររួមរួមជាតិ ក៏មានតែពេលនេះទេ»។
លោក ញឹក ប៊ុនឆៃ បានស្នើដល់ថ្នាក់ដឹកនាំគ្រប់លំដាប់ថ្នាក់ ឱ្យប្រឹងប្រែងយកចិត្តទុកដាក់ធ្វើសកម្មភាពនយោបាយទាំងអស់គ្នា ដើម្បីផលប្រយោជន៍របស់គណបក្ស ប្រទេសជាតិ និងជាកម្លាំងធំធាត់មួយ ដើម្បីអាចជួយកែប្រែចំណុចខ្វះខាតរបស់ប្រទេសជាតិ។ប្រធានគណបក្សខាងលើ បានអំពាវនាវកុំឱ្យសមាជិក សកម្មជន និងថ្នាក់ដឹកនាំគ្រប់រចនាសម្ពន្ធទាំងថ្នាក់ជាតិ និងថ្នាក់មូលដ្ឋាន ត្រូវចេះអធ្យាស្រ័យ និងយោគយល់គ្នា គឺធ្វើយ៉ាងណាកុំឱ្យឈ្លោះគ្នា។ប៉ុន្តែបើមានបញ្ហាអ្វីត្រូវនិយាយគ្នា និងដោះស្រាយដោយសន្តិវិធី។កាសែតខ្មែរថាមស៍ ពុំអាចសុំការបញ្ជាក់បន្ថែមពីលោក ញឹក ប៊ុនឆៃ បានឡើយកាលពីម្សិលមិញ។លោក ទិប ទាវ អគ្គលេខាធិការរងនៃគណបក្សខ្មែររួបរួមជាតិ ប្រាប់កាសែតខ្មែរថាមស៍ កាលពីម្សិលមិញថា លោក ញឹក ប៊ុនឆៃ ពិតជាបានប្ដេជ្ញាចិត្តខ្ពស់លាលែងតំណែងកំពូលរបស់គណបក្សពិតមែន បើសិនគណបក្សខ្មែររួបរួមជាតិ មិនទទួលបានអាសនៈក្នុងសភា។លោកបន្ថែមថា បច្ចុប្បន្ននេះ គណបក្សរបស់លោកកំពុងទទួលបានការគាំទ្រ និងប្រជាប្រិយភាពច្រើនពីសំណាក់ប្រជាពលរដ្ឋនៅតាមមូលដ្ឋាន ជាពិសេស មានការរួមបញ្ចូលគ្នារវាងបក្សខ្មែររួបរួមជាតិ និងគណបក្សកម្ពុជានិយម ដែលធ្វើឱ្យកម្លាំងគណបក្សកាន់តែធំធាត់ និងខ្លាំងឡើង ហើយការបោះឆ្នោតនៅខែកក្កដាខាងមុខ នឹងទទួលបានអាសនៈច្រើននៅក្នុងសភា។លោក ទិប ទាវ បញ្ជាក់ថា៖ «ក្នុងនាមជាសេនាធិការ ក៏ដូចជាសមាជិកគណបក្សមួយរូប ខ្ញុំពិតជារំភើបដែលមានថ្នាក់ដឹកនាំជាអ្នកមានទំនួលខុសត្រូវខ្ពស់ ហើយក៏មានមោទកភាពដែលមានថ្នាក់ដឹកនាំជាគំរូ [,,,] ដែលធ្វើឱ្យពួកយើងទាំងអស់គ្នាកាន់តែប្រឹងប្រែងបន្ថែមទៀតឱ្យអស់លទ្ធភាព»។អគ្គលេខាធិការរងគណបក្សខាងលើបន្ថែមថា គិតរហូតដល់បច្ចុប្បន្ន គណបក្សមិនទាន់ជ្រើសមនុស្សជំនួសលោក ញឹក ប៊ុនឆៃ បាននៅឡើយ ព្រោះរង់ចាំក្រោយថ្ងៃចេញលទ្ធផលបោះឆ្នោតជ្រើសតាំងតំណាងរាស្ត្រ នីតិកាលទី៧ ជាពិសេស ត្រូវឆ្លងកាត់ការពិភាក្សា និងប្រជុំសម្រេច ដែលធ្វើឡើងតាមនីតិវិធី និងលក្ខនិករបស់គណបក្សជាមុនសិន។លោក ញឹក ប៊ុនឆៃ ដែលមានវ័យ៦៥ឆ្នាំ បានឈរជាបេក្ខជនតំណាងរាស្រ្តនៅមណ្ឌលបន្ទាយមានជ័យ សម្រាប់ការបោះឆ្នោតថ្នាក់ជាតិលើកទី៧។ គណបក្សខ្មែររួបរួមជាតិ ធ្លាប់ចូលរួមបោះឆ្នោតថ្នាក់ជាតិនៅអាណត្តិទី៦ កាលពីឆ្នាំ២០១៨ តែពុំទទួលបានអាសនៈក្នុងរដ្ឋសភាឡើយ។លោក ញឹក ប៊ុនឆៃ ធ្លាប់ធ្វើជាអនុប្រធានគណបក្សហ៊្វុនស៊ិនប៉ិច និងជាអតីតឧបនាយករដ្ឋមន្រ្តី ព្រមទាំងជាមេយោធាជាន់ខ្ពស់របស់គណបក្សហ៊្វុនស៊ិនប៉ិច។ លោកបានចាកចេញពីគណក្សហ្វ៊ុនស៊ិនប៉ិច ហើយបានទៅបង្កើតគណបក្សខ្មែររួបរួមជាតិកាលពីឆ្នាំ២០១៦។គណៈកម្មាធិការជាតិរៀបចំការបោះឆ្នោត(គ.ជ.ប) បានសម្រេចទទួលស្គាល់ជាផ្លូវការលើការចុះបញ្ជីរបស់គណបក្សនយោបាយឈរឈ្មោះបោះឆ្នោតនិងបញ្ជីបេក្ខជនឈរឈ្មោះបោះឆ្នោតចំនួន១៨ គណបក្សនយោបាយ ខណៈគណបក្សភ្លើងទៀន ដែលជាគណបក្សប្រឆាំងដ៏ធំនៅកម្ពុជា ត្រូវបានបដិសេធមិនឱ្យចូលរួមប្រកួតប្រជែងលើការបោះឆ្នោត ដោយមិនបានបំពេញគ្រប់លក្ខខណ្ឌរបស់ គ.ជ.ប។គិតត្រឹមថ្ងៃទី២២ ខែឧសភា ឆ្នាំ២០២៣ គ.ជ.ប បានចេញបណ្ណសម្គាល់ខ្លួនជាផ្លូវការដល់អ្នកសារព័ត៌មានជាតិចំនួន ២២០នាក់ មកពី ២១ អង្គភាព និងអ្នកសារព័ត៌មានអន្តរជាតិចំនួន ៣០នាក់ ដែលមកពី ១៤ អង្គភាព ដើម្បីអាចចូលរួមយកព័ត៌មានបោះឆ្នោតជ្រើសតាំងតំណាងរាស្ត្រ នីតិកាលទី៧ នាថ្ងៃទី២៣ ខែកក្កដា ឆ្នាំ២០២៣៕ Khmer Times
/unnamed.png
Post a Comment