សម្ដេច​ហ៊ុន ​សែន​​​​អំពាវនាវចូលរួម​លើ​កទឹ​កចិត្តនិ​ងគាំទ្រព្រឹត្តិ​ការ​​ណ៍​កីឡាអាស៊ាន​ប៉ារ៉ា​ហ្គេមលើក​ទី​១២

សម្ដេចហ៊ុន សែននាយករដ្ឋមន្រ្តីនៃកម្ពុជាបានអំពាវ​នាវឱ្យ​កម្មករកម្មការិនី ចូលរួមលើកទឹកចិត្តគាំទ្រព្រឹត្តិការណ៍កីឡាអាស៊ានប៉ារ៉ាហ្គេម លើកទី១២ ក្នុងខណៈដែលកម្ពុជាធ្វើជាម្ចាស់ផ្ទះនោះ។

 ការអំពាវនាវរបស់សម្តេចតេជោប្រមុខរាជរដ្ឋា​ភិបាលត្រូវបានធ្វើឡើង ក្នុងឱកាសអញ្ជើញទៅជួបសំណេះសំណាលជាមួយកម្មករ និយោ​ជិត មកពីរោងចក្រចំនួន៣ គឺរោងចក្រម៉ាវ៉ល ហ្គាមិន (Marvel Garment) រោងចក្រ រ៉ុងវីន ហ្គាមិន(Rong wing Garment )និងរោងចក្រដាគ្វានថេកស្ថាយ ខេមបូឌា (DNQIAN TEXTILE CAMBODIA) ដែលមានទីតាំងនៅក្នុងតំបន់សេដ្ឋកិច្ចពិសេស រ៉ូយ៉ាល់គ្រុបភ្នំពេញ សរុប​ប្រមាណ​ជិត២ម៉ឺននាក់ នាព្រឹកថ្ងៃទី២៦ ខែឧសភា ឆ្នាំ២០២៣។ សម្ដេចហ៊ុន សែន មានប្រសាសន៍ថា  នៅសល់ពេលតែ៨ថ្ងៃទៀតទេ​កីឡាជនពិការនឹងចាប់ផ្ដើម។ ដូច្នេះក្មួយៗទាំងឡាយត្រូវតែចូលរួមគាំទ្រលើកទឹក​ចិត្តឱ្យ​កីឡាជនពិការរបស់យើងដែលមិនខុសពីកីឡាដែលមានការសម្បទាល្អនោះទេ។សម្ដេច​បានបញ្ជាក់ដែរថា ល្ងាចថ្ងៃទី២៦ ខែឧសភានេះ សម្ដេចនឹងជួបសំណេះសំណាល​ជូនដំណើរ កីឡា កីឡាការិនីដែលជាជនពិការទៅចូលរួមប្រកួតដែលនឹងត្រូវបើក​ជា​ផ្លូវការនៅល្ងាចថ្ងៃទី០៣ ខែមិថុនា ឆ្នាំ២០២៣ ដើម្បីលើកទឹកចិត្ត និងស្វាគមន៍ចំពោះ កីឡារ កីឡាការិនី ដែលសុទ្ធតែជនពិការមកពី១១ប្រទេស។ សម្ដេចនាយករដ្ឋមន្រ្ដី​បានគូសបញ្ជាក់ទៀតថាព្រឹត្តិការណ៍កីឡាអាស៊ានប៉ារ៉ាហ្គេមលើកទី១២ ដែលកម្ពុជាធ្វើ​ជាម្ចាស់ផ្ទះនេះក៏ដូចជាថ្ងៃបុណ្យមួយដែរ។ដែលយើងសប្បាយរីករាយទាំងអស់គ្នា ហើយ​ប្រធានបទកីឡារស់ក្នុងសន្តិភាព គឺជាប្រធានបទដែលត្រូវបំផុត។ដូច្នេះត្រូវរួមគ្នា​ការពារ​សន្តិភាព ការពារស្ថិរភាពនយោបាយឱ្យខាងតែបាន។​គួរបញ្ជាក់ដែរថា ព្រឹត្តិការណ៍កីឡាអាស៊ានប៉ារ៉ាហ្គេមលើកទី១២ គ្រោងនឹង​ដំណើរ​ការជាផ្លូវការ ចាប់ពីថ្ងៃទី០៣ ដល់ថ្ងៃទី០៩ ខែមិថុនា ឆ្នាំ២០២៣ឆាប់ៗខាងមុខនេះ។ក្នុងចំណោម១៤ប្រភេទកីឡានៃអាស៊ានប៉ារ៉ាហ្គេម ២០២៣ មានវិញ្ញាសាសរុបចំនួន ៤៧៤​វិញ្ញាសា។ សម្រាប់កីឡាករ កីឡាការិនីពិការម្ចាស់ផ្ទះកម្ពុជា មានចំនួនសរុប ២៣៦នាក់ ដែល​ចំនួននេះមានចំនួនច្រើនជាង២ដងបើប្រៀបធៀបនឹងចំនួនអត្តពលិកពិការកម្ពុជា ដែលចូលរួមប្រកួតអាស៊ានប៉ារ៉ហ្គេម លើកទី១១ នៅទីក្រុងសូឡូ ប្រទេសឥណ្ឌូណេស៊ី កាលពីឆ្នាំ២០២២ កន្លងទៅ៕AKP