លោកPutinបាននិយាយថាអ៊ុយក្រែនកំពុងព្យាយាមបំភ័យប្រជាជនរុស្ស៊ី
លោកប្រធានាធិបតីPutinបាននិយាយថាអ៊ុយក្រែនកំពុងព្យាយាមបំភិតបំភ័យប្រជាជនរុស្ស៊ីបន្ទាប់ពីទីក្រុងម៉ូស្គូនិងតំបន់ជុំវិញត្រូវបានវាយប្រហារដោយ UAVចំនួន៨គ្រឿង។លោកប្រធានាធិបតីVladimirPutinបាននិយាយនៅថ្ងៃនេះថា "ប៉ុស្តិ៍បញ្ជាការនៅក្នុងប្រទេសអ៊ុយក្រែនត្រូវបានវាយប្រហារកាលពី ២ឬ៣ថ្ងៃមុន។ជាការឆ្លើយតបរដ្ឋាភិបាលនៅទីក្រុងគៀវបានជ្រើសរើសផ្លូវមួយផ្សេងទៀតដោយស្វែងរកការបំភិតបំភ័យរុស្ស៊ី បំភិតបំភ័យពលរដ្ឋរុស្ស៊ី និងវាយឆ្មក់អគារលំនៅដ្ឋាន។ថៅកែវិមានក្រឹមឡាំងបានធ្វើអត្ថាធិប្បាយបន្ទាប់ពីអគារផ្ទះល្វែងមួយចំនួននៅទីក្រុងម៉ូស្គូនិងតំបន់ជុំវិញត្រូវបានវាយប្រហារដោយយានជំនិះគ្មានមនុស្សបើក(UAVs) ។ រុស្ស៊ីបានចោទអ៊ុយក្រែនថាជាអ្នកនៅពីក្រោយឧប្បត្តិហេតុ ដែលក្រុងគៀវបានបដិសេធ។ យោងតាមក្រសួងការពារជាតិរុស្ស៊ីយន្តហោះUAVចំនួន ៨គ្រឿងបានចូលរួមក្នុងការវាយប្រហារហើយទាំងអស់ត្រូវបានបាញ់ទម្លាក់ដោយកងកម្លាំងការពារដែនអាកាសរបស់ប្រទេស។ប្រធានាធិបតី Putinបាននិយាយថាការការពារដែនអាកាសរបស់ទីក្រុងម៉ូស្គូមានប្រសិទ្ធភាពក្នុងឧបទ្ទវហេតុនេះ។ប៉ុន្តែបានបន្ថែមថា"នៅមានការងារមួយចំនួនដែលត្រូវធ្វើ"។អភិបាលក្រុងម៉ូស្គូ លោក Sergey Sobyanin បាននិយាយមុននេះថាអគារមួយចំនួនបានរងការខូចខាតបន្តិចបន្តួច បន្ទាប់ពីការវាយប្រហារដោយយន្តហោះគ្មានមនុស្សបើក ហើយមនុស្ស២នាក់បានរងរបួស។ប៉ុន្តែមិនធ្ងន់ធ្ងរនោះទេ។ក្រសួងការបរទេសរុស្ស៊ីបាននិយាយនៅថ្ងៃនេះថាការគាំទ្ររបស់លោកខាងលិចសម្រាប់អ៊ុយក្រែន "បានជំរុញឱ្យទីក្រុងគៀវចាត់វិធានការកាន់តែខ្លាំងឡើង រួមទាំងអំពើភេរវកម្ម"។ទីភ្នាក់ងារនេះបានចោទប្រកាន់ការវាយប្រហារនៅទីក្រុងម៉ូស្គូថាជា«ការបង្កការភ័យស្លន់ស្លោក្នុងចំណោមជនស៊ីវិល»។
ក្រសួងការបរទេសរុស្ស៊ីបាននិយាយនៅក្នុងសេចក្តីថ្លែងការណ៍មួយថា "ការធានាពីមន្ត្រីណាតូដែលថាទីក្រុងគៀវនឹងមិនវាយប្រហារជ្រៅនៅក្នុងប្រទេសរុស្ស៊ីបានប្រែទៅជាមិនពិត"ដោយបន្ថែមថាទីក្រុងម៉ូស្គូរក្សាសិទ្ធិក្នុង "វិធានការខ្លាំងបំផុត"ដើម្បីឆ្លើយតបទៅនឹងការវាយប្រហារដោយយន្តហោះគ្មានមនុស្សបើក។សេតវិមានបាននិយាយនៅថ្ងៃនេះថា សហរដ្ឋអាមេរិកនៅតែប្រមូលព័ត៌មានពាក់ព័ន្ធនឹងការវាយប្រហារដោយយន្តហោះគ្មានមនុស្សបើកលើទីក្រុងម៉ូស្គូ។វ៉ាស៊ីនតោនបានអះអាងសារជាថ្មីថា ខ្លួនមិនគាំទ្រការវាយប្រហារលើទឹកដីរុស្ស៊ីឡើយហើយផ្តោតលើការជួយក្រុងគៀវក្នុងការដណ្តើមយកទឹកដីរបស់ខ្លួនមកវិញ។រុស្ស៊ីបានចោទប្រកាន់អ៊ុយក្រែនម្តងហើយម្តងទៀតថាបានធ្វើការវាយប្រហារដោយយន្តហោះគ្មានមនុស្សបើកនៅក្នុងទឹកដីរបស់ខ្លួនដោយផ្តោតលើហេដ្ឋារចនាសម្ព័ន្ធស៊ីវិល និងយោធា។ រដ្ឋាភិបាលអ៊ុយក្រែននិងយោធាមិនអះអាងទទួលខុសត្រូវចំពោះការផ្ទុះនៅក្នុងប្រទេសរុស្ស៊ីទេ។ខេត្តBelgorodនិងតំបន់ព្រំដែនរុស្ស៊ីជាច្រើននាពេលថ្មីៗនេះ ត្រូវបានទទួលរងនូវការវាយឆ្មក់ជាបន្តបន្ទាប់ ដែលត្រូវបានចាត់ទុកថាជាខេត្តដ៏ធំបំផុត ចាប់តាំងពីសង្គ្រាមរុស្ស៊ី និងអ៊ុយក្រែនបានផ្ទុះឡើងក្នុងខែកុម្ភៈ ឆ្នាំ២០២២។ ការវាយឆ្មក់នេះបានធ្វើឡើងក្នុងបរិបទដែលកងទ័ពអ៊ុយក្រែនត្រៀមបើកប្រតិបត្តិការវាយលុកដ៏ធំ៕ប្រភពAFP,Reuters
/unnamed.png
Post a Comment